Endiliga runnu tey aftur maraton

Tórshavn Maraton var aftur runnið eftir tvey ára koronusteðg. Rennarar og fyrireikarar gleddust, og onkur gamal kenningur var eisin við aftur

Símun Christian Olsen

13.06.2022 - 17:50

Tvær ferðir hevur korona bremsað Tórshavn Maraton.

Í 2020 vórðu mestsum øll ítróttartiltøk avlýst. Verri var árið eftir, tá fyrireikararnir fyrst útsettu og síðan avlýstu renningina í evstu løtu.

- Tað var øgiliga ørkymlandi, og tað kendist sum luftin fór úr ballónini, segði Ann Thomsen, sum er ein av fyrireikarunum úr Bragdið.

Ballónin var kortini ikki heilt tóm, tí um vikuskiftið eydnaðist endiliga hjá Tórshavn Maraton. Góðir 500 rennarar úr 30 londum settu kós úr miðbýnum og út á ymsu teinarnar, sum rennast kundu.

- Eg hopi, at vit fáa ein ordiliga góðan dag, at veðrið verður gott og at øll eru glað og koma á mál, segði Ann Thomsen undan renningini.

Vann fyri fjórðu ferð

Trífaldi vinnarin Raoul Jankowski var við aftur, tilreiðar at verja heitið.

- Eg havi saknað tiltakið síðstu tvey árini, og tí eri eg fegin um at vera við aftur, segði týski rennarin.

- Øll eru so vinarlig her.

Raoul Jankowski vísti kortini onga náði á 42 kilometra langa teininum. Hann fylgdist við Bjarka Johannesen, sum rann hálvmaraton, fyrstu løtuni, áðrenn hann setti ferð á.

Týskarin vann trygt við nýggjari mettíð, 2.35.11.

- Eg eri sera fegin um úrslitið, tí tað var nógvur mótvindur í byrjanini, men á veg aftur hevði eg vindin undan, og tá gekk munandi skjótari, segði Raoul Jankowski á málinum.

Besti føroyski rennarin var Peter Jensen, sum kom á mál á triðja plássi.

Ann-Mari av Skarði fremsta føroyska kvinnan

Belgiska Astrid Van Cleef vann kappingina hjá kvinnum.

Fremsta føroyska kvinnan var Ann-Mari av Skarði, sum fekk bronsuna.

- Tað er fantastiskt, og eg havi ikki ordiliga skilt tað. Eg hevði ikki væntað, at eg fór at blíva føroyameistari, men eg rann ta tíðina, eg fór eftir, segði Ann-Mari av Skarði.