Elias, Hákun og hinir: skulu royna seg ímóti risunum

Risastór avbjóðing stendur fyri framman hjá Eliasi á Skipagøtu, Hákuni West av Teigum og hinum á U20-hondbóltslandsliðnum, sum skal kappast um EM-heiti í endaspælinum í Portugal.

Danmark, Slovenia og Ungarn eru mótstøðuliðini í 'deyðsbólkinum', sum onkur hevur doypt hann. 

 - Vit hava vant hart nú í langa tíð, og nú merkist á bæði venjarum og spælarum, at tað byrjar at nærkast, sigur annar av venjarunum, Julian Johansen.

Saman við Mark Lausen-Marcher hevur hann staðið á odda fyri fyrireikingunum, sum hava vart í nógvar vikur.

Stjørnurnar gleða seg sum smábørn

Tveir av stóru spælarunum á liðnum, Elias á Skipagøtu og Hákun West av Teigum, hava hóast ungan aldur longu roynt eitt sindur av hvørjum í hondbólti. 

Elias á Skipagøtu hevur vunnið svenska meistaraheitið við felagið sínum, IK Sävehof, har hann eisini hevur spælt evropeiskan hondbólt, meðan Hákun West av Teigum umboðar Skanderborg Aarhus í bestu donsku deildini.

Báðir teljast teir millum bestu spælararnar á føroyska A-landsliðnum, sum fyrr í ár millum annað spælda play-off dystir ímóti Týsklandi. Báðir siga kortini, at komandi kappingin og hetta liðið er nakað serligt.

 - Vit eru jú ein bólkur, sum hevur hildið saman og upplivað nógv ígjøgnum nógv ár. Vit gleða okkum serliga nógv í ár, tí EM er tað størsta, sum vit higartil hava roynt, sigur Hákun West av Teigum.

 - Hetta eru allir vinmenninir, sum vit altíð hava spælt saman við. Vit hava spælt saman, síðan vit vóru eini átta ár, so tað er nakað serligt, tá vit eru avstað saman, sigur Elias á Skipagøtu.

Føroyska ferðaliðið fer avstað týsdagin, og spælir fyrsta dystin hósdagin, tá Danmark verður mótstøðulið. Væntað verður, at fleiri hundrað føroyingar vera í Porto, meðan kappingin verður spæld.