Vit vinna uppiborið ímóti 80 milliónum

Liðskiparin var errin eftir 2-1 sigurin á Turkalandi sunnukvøldið.

 - Hetta er heilt fantastiskt. Tað búgva 80 milliónir í Turkalandi, og vit vinna uppiborið 2-1. Tað haldi eg, vit kunnu vera ekstremt stoltir av, segði Viljormur Davidsen eftir stóra úrslitið.

Vinstri bakkurin, sum er liðskipari í Helsingborgs, hevur tikið ábyrgdina á seg eftir at Hallur Hansson fekk álvarsaman knæskaða, og hann var errin av liðfeløgunum eftir dystin.

Hann skeyt sjálvur Føroyar framum tíðliga í seinna hálvleiki. 

 - Sølvi fer ígjøgnum í høgru, og tá hann setir mannin hjá sær, síggi eg eitt hol, og bólturin kemur har. So er eitt at gera, og tað er at seta hann í kassan, og tað var heilt fantastiskt, greiddi Viljormur Davidsenf frá.

Hetta var fjórða landsliðsmálið hjá støðuga vinstra bakkinum, sum nú fekk enn ein minniliga sigur í skjáttuna.