Risastór sponsk avbjóðing bíðar

Tveir dystir ímóti spanska liðnum, Atletico Guardés, bíða kvinnum hjá H71 í áttandapartsfinaluni í European Cup.

Uppgávan er stór, viðgongur Maria Halsdóttir Weyhe, og hon verður ikki minni av, at báðir dystirnir skulu spælast á útivølli. 

 - Vit skulu møta einum liðið, sum hevur staðið seg øgiliga væl síðstu árini, bæði í sponsku kappingini og í Evropa, men vit eru øgiliga spentar upp á at vita, um vit kunnu bjóða teimum av, sigur H71-spælskiparin.

Í fjør spældi H71 seg í fjórðingsfinalurnar í somu kapping. Har endaði alt við einum skriviborðsósigrið fyri ukrainska liðnum, HC Galychanka Lviv, eftir at hoyvíkingar ikki fingu møtt til útidystin orsakað av krígnum í Ukraina. 

Skulu fjórðingsfinalurnar røkkast aftur í ár, skal mestsum alt ganga upp í eina hægri eind, heldur Maria Halsdóttir Weyhe.

 - Fyrireikingin skal vera í topp, fyri at vit kunnu hava ein møguleika. Vit mugu fyrireika okkum upp á alt tað, sum tær koma við, so vit hava svarini til reiðar, sigur Maria Halsdóttir Weyhe. 

 - Og so er tað sjálvandi at koma við øllum, sum vit hava, á sjálvum leikdegnum.

Fyrri dysturin ímillum H71 og Atletico Guardés verður spældur leygarkvøldið klokkan 18:00, og seinni dysturin verður dagin eftir, sunnudagin, og hann er eisini klokkan 18:00.