Formaðurin: Trýr upp á veking við Stórá

 - Hundrað prosent, hundrað prosent.

Tað svarar formaðurin í Tvøroyrar bóltfelag, André Dalfoss, tá hann verður spurdur um, hann trýr upp á veking við Stórá.

Fyrireikingar hjá uppflytaranum og aldursforsetanum í føroyskum fótbólti hava verið rokaligar og merktar av órógvi. André Dalfoss, sum í 2014 fór frá sum formaður í TB og fekk forboð ímóti at at verða við í fótbóltsvirksemi í fýra ár fyri brot á reglurnar um fótbóltssáttmálar, er aftur við stýrisvølin, og hann hevur greið mál.

TB skal varðveita plássið í bestu deildini, og áskoðaraplássini við Stórá skulu aftur fyllast við viðhaldsfólkum. 

 - Okur ynskja at fáa fólk vestur aftur við Stórá at fylla setrini uttanfyri her, sigur formaðurin og peikar afturum seg, har Betri-deildarhópurin er í gongd við venjing.

Í februar - umleið ein mánað fyri kappingarbyrjan - var danski venjarin, Dan Jensen, sendur til hús. 

 - Okur ynsktu eina kós, og hann ynskti eina aðra, og tað fungeraði slett ikki, sigur André Dalfoss.

Zoran Pavlovic, ið eisini vandi TB í 2019, er aftur á síðulinjuni, og hann og TB-viðhaldsfólkini fingu eina óvæntaða gávu, tá landsliðsspælarin, Gilli Rólantsson Sørensen, skrivaði undir sáttmála við barndómsfelagið, har hann ætlar at spæla til í summar. 

Fótbóltsviðmerkjarar eru skeptiskir, men André Dalfoss trýr upp á, at tað ber til at vekja felagið og fólkini rundanum.

 - TB er á rættari kós... øll standa saman um TB nú. Spælarar, stuðlar og viðhaldsfólk, sigur hann. 

3-2 tosaði við André Dalfoss 20. mars. Sí samrøðuna omanfyri.