Nøgdur við avrikið men ikki við úrslitið

Hann var væl nøgdur við føroyska avrikið, men úrslitið kundi verið betri.

Føroyski landsliðsvenjarin, Håkan Ericson, vísti á, at Føroyar hevði bóltin nærum eins nógv og útiliðið, men ásannaði at royndin at spæla álopsfótbólt kostaði eitt brotsspark og eitt mál.

 - Men eg haldi, at tað er hetta, sum vit mugu royna, og ikki bert dúga upp á útspørk og kontraspæl, og tað gera vi nógv betri í dag enn ímóti Kekkia, segði Håkan Ericson eftir 3-1 tapið fyri Albania.

Nedim Bajrami legði Albania framum, tá 20 minuttir vóru spældir, og tað kundi verið verri stutt eftir, tá Heini Vatnsdal gjørdi brotsspark. Lukkutíð fyri Føroyar, kastaði Teitur Matras Gestsson seg rætta vegin og stórbjargaði skotinum frá Sokol Çikalleshi.

Beint fyri steðgin javnaðu Føroyar. Jóan Símun Edmundsson sendi eitt fríspark innfyri, og Odmar Færø var hægstur og fekk sítt annað mál fyri landsliðið.

Heimaliðið byrjaði væl í seinni hálvleiki, men fekk sum vátan vøtt, tá Kristjan Asllani smekkaði bóltin upp í handara málhornið eftir horna í høgru. Føroyar royndu at javna, og Odmar Færø, Andrass Johansen og Jóannes Bjartalíð vóru allir nær við.

Í staðin staðfesti Ernest Muçi albanska sigurin eftir skjótálop í yvirtíðini.

 - Mál eru mál, men vit hava latið langskot inn, sum øll eru farin upp í málhorni, og viðhvørt hevur tú brúk fyri hepni. Eg skal ikki skylda upp á óhepni, men vit hava í øllum førum ikki hepni við okkum, segði landsliðsvenjarin.