- Tað skal nokk venda

Talan gjørdist um enn eitt tap, tá Kekkia tók ímóti Føroyum í Plzen sunnukvøldið. 

Avrikið í mun til útgangstøðið var kortini munandi betri enn í onkrum av undanfarnu dystunum, og tað hoyrdist eisini á René Shaki Joensen eftir 1-0 tapið.

 - Sum tú sært, so koma ungir spælarar inn, og tað útviklar seg, so eg ivist ikki í, at tað skal nokk venda. Tað er bara ein spurningur um tíð, segði René Shaki Joensen.

Føroyar høvdu vart allan fyrra hálvleik, og eftir steðgin vóru løtur, har spælið við bóltinum sá gott út. 76 minuttir gingu, áðrenn Odmar Færø aftur var óheppin, tá hann fekk bóltin í armin.

 - Hann kemur í hondina, men tað er av óvart. Hann taklar fyri at dekka bóltin, men nemur hann hondina inni í brotsteiginum, so er tað ofta straffi, segði René Shaki Joensen.

Tomas Soucek var eirindaleysur og setti bóltin í netið aftan fyri ein kjansaleysan Mathias Lamhauge, og so vann Kekkia tepurt, hóast Sølvi Vatnhamar kundi og kanska átti at havt javnað stutt eftir brotssparkið.