Runnu øvutan veg runt Agnið

Um vikuskiftið varð skotið fyri fyrstu vetrarkappingini í renning, og sum vanligt varð runnið runt Agnið.

Alt var kortini ikki, sum tað plagar, tí Roysnið, sum skipaði fyri, hevði gjørt av, at rennast skuldið øvutan veg. Í staðin fyri at leggja leiðina úteftir skuldu rennararnir inneftir ímóti Saltnesi, runt Rókina til Runavíkar, so niðan á Agnið áðrenn endað var við undabrekku oman til Tofta Skúla.

 - Eg haldi, at tað er stuttligt at sleppa at renna tað, sum vit kalla runavíksveg, segði formaðurin í Roysnið, Arnfinn Johannesen.

 - Onkur sigur, at tað er skeivur vegur runt um Agn, men runavíkingar renna altíð tann vegin runt um Agn, og toftafólk renna altíð hin vegin.


Ein heilt onnur kapping

Stórur munur er á at byrja við brøttu mótbrekkuni niðan á Agnið og at byrja á sløttum inn til Runavíkar, áðrenn langa mótbrekkan byrjar.

 - Nú byrja vit á sløttum í eini tríggjar kilometrar, og so fær mann eina langa mótbrekku, sum ikki er so brøtt. Hetta er ein heilt onnur kapping at renna, sigur Arnfinn Johannesen.