Beinleiðis fyrireiking til dystin móti Albania

Í annaðkvøld spælir føroyska A-landsliðið móti Noregi á Ullevaal leikvøllinum í Oslo.

Dysturin er klokkan 18 og verður stroymdur á heimasíðuni hjá Kringvarpinum.

Landsdystir altíð nakað serligt

Hóast talan er um ein vinardyst, krevst eingin eyka motivatión, sigur verjuskansin, Odmar Færø.

Norra er grannaland og vit eru lítlibeiggin, tað er ikki neyðugt at brúka orku upp á at seta okkum upp, er boðskapurin hjá KÍ-miðverjanum.

Trýstið er kanska ikki tað sama í vinardystum, sigur Viljormur Davidsen, varaliðskipari, sum kortini leggur dent á, at avrikið ongantíð skal liggja eftir.

Varaliðskiparin heldur eisini, at í vinardystum er møgueiki fyri at spæla meira ósmæðið.

Huglagið og samanhaldið gott

Landsliðið stendur saman og huglagið er gott í hópinum, hóast úrslitini í hesari EM-undankappingini ikki hava verið minnisverd, tað siga Odmar Færø og Viljormur Davidsen, sum tilsamans hava spælt 129 landsdystir fyri Føroyar.

Føroyska landsliðið hevur bert megnað at fingið eitt stig í EM-undankappingini. Tað kom í 1-1 javnleikinum móti Moldova á útivølli 24. mars í ár, sum eisini var fyrsti dysturin í hesari EM-undankappingini.

Síðani er tað blivið til seks ósigrar upp í slag, seinast tapti landsliðið 1-0 fyri Kekkia í Plzen.

Fýra ferðir áður móti Noregi

A-landsliðið hjá monnum hevur spælt fýra ferðir móti Noregi og tapt hvørjaferð.

Landsliðið spældi tveir vinardystir í 1992 og 1993 móti norðmonnum.

Fyrra dystin taptu føroyingar 2-0 og seinna 7-0.

Í undankappingini til EM 2020, spældi føroyska landsliðið eisini tvær ferðir móti Noregi.

Á útivølli tapti føroyingar 2-0 og á heimavølli 4-0, báðir dystirnir vóru spældir í 2019.