Fyrsti nýbygningur í heimaflotanum í 17 ár

Seinast nýbygningar komu, var tá ið Heykur og Falkur vórðu bygdir í 2007 í Spania.

Varðin fer nú at byggja nýtt skip fyri Rankan, sum felagið seldi vestur í Vágar fyri jól.

- Tað hevur sera stóran týdning at endurnýggja flotan, sigur Bogi Jacobsen, stjóri í Varðanum. 

Hvørki Varðin ella Mest vilja upplýsa prísin fyri nýggja skipið. Við útvarpið segði Bogi Jacobsen tó, at prísurin er millum 100 og 200 milliónir krónur.

Alt verður nýtt umborð. Fiskurin verður kruvdur og avhøvdaður og síðani frystur. Flakavirki í Føroyum ella aðrastaðni kunnu keypa fiskin og tiðna hann upp at virka. Súrløga verður eisini nýtt.

Stóran týdning fyri Mest

Mouritz Mohr, stjóri á Mest, sigur, tað hava sera stóran týdning, at føroyingar aftur fara at smíða skip.

Á skipasmiðjuni Mest fegnast tey, nú sáttmáli er undirskrivaður millum Mest og Varðan um at byggja nýggjan frystitrolara til fyritøkuna í Gøtu.

Nýggja skipið hjá Varðanum, sum verður 44 metrar langt og 12 metrar breitt, skal verða liðugt á sumri í 2026. Tørvur er á nógvum arbeiðsfólki at gera arbeiði. 

---