Vandamikil list í Sandoyartunlinum

- Listin fær okkum at hyggja burtur frá vegnum, og tað kann vera vandamikið fyri ferðslutrygdina, sigur Lovisa Petersen Glerfoss, stjóri í Ráðnum fyri ferðslutrygd.

Dagin eftir at Sandoyartunnilin lat upp, 22. desember í fjør, álegði Sigurd L Lamhauge, táverandi stjóri í Landsverki, tunnilsfelagnum at taka listaverkini niður. 

Hann segði, at at listarverkini eru vandamikil fyri ferðslutrygdina. 

Men Teitur Samuelsen, stjóri í tunnilsfelagnum, skúgvaði boðini til viks og segði, at Landsverk ikki var myndugleiki, tá ið talan var um undirsjóvartunlar.

Eftir at Landsverk hevði góðtikið tunnilin, vórðu listaverkini sett upp.

Trygdin í tunlum stóran týdning

Lovisa Petersen Glerfoss fegnast um, at Landsverk gjørdi vrøvl um listaverkini.

Tað er týdningarmikið ikki at verða órógvað ella órógvaður, tá ið ein koyrir bil.

Gáloysni undir koyring er eitt av tí, sum kann hava sera stóra ávirkan á ferðsltrygdina.

Hon vísir á, at trygdin í tunlum hevur sera stóran týdning.

Landsferðslunevndin

Hvørki Sigurd L. Lamhauge, fyrrverandi stjóri í Landsverki ella Teitur Samuelsen, stjóri í Eystur- og Sandoyartunlum, vilja gera viðmerking til Kringvarpið um málið.

Michael Boelsen, fúti, vil heldur ikki gera viðmerking til málið. Hann vísir á, at málið verður tikið upp í Landsferðslunevndini.

Nær fundur verður, er  enn ógreitt.