Flýgur 800 kilometrar fyri at finna føði

Síðani 2022 eru GPS'arar settir á drunnhvítar í Nólsoy. Nú byrja granskarar at fáa nýggjar og áhugaverdar upplýsingar.

Ein av upplýsingunum, ið gjørdu granskarar bilsnar, er hvussu langt drunnhvítin flýgur fyri at finna føði til ungan - upp í 800 kilometrar.

- Vit hava dømi um ein drunnhvíta, sum flýgur 350 kilometrar eystur í hav, áðrenn hann vendir heim aftur til ungan. Drunnhvítin er burtur í næstan trý samdøgur, sigur Ben Porter úr Wales, sum kannar og skrivar phd um drunnhvíta. 

Drunnhvítar í Nólsoy eru ringmerktir síðani 1984, men tað er nústani, nú gps'ari verður settur á, at fleiri upplýsingar koma fram. Higartil eru GPS'arar á sjey drunnhvítum, men ætlanin er at fáa á minst níggju afturat í ár. 

Fyri at fáa fatur á drunnhvítunum, eru kassar gjørdir, har drunnhvítarnir fara inn og reiðrast og verpa.

- Um ein vindmyllulund kemur eystan fyri Nólsoynna kann tað ávirka drunnhvítastovnin. Tí má alt kannast nærri, sigur Jens Kjeld Jensen, fuglaáhugaður.

Granskingarráðið, Hiddenfjord og Umhvørvisstovan stuðla verkætlanini.