Maria slapp at ringja við sigursklokkuni

Tað var ein fegin Maria Biskopstø, sum slapp at ringja við sigursklokkuni frammanfyri langsíðuni á Picky-rennibreytini í Kirkwall týskvøldið.

Lítla løtu frammanundan hevði hon vunnið sannførandi sigur í 400 metur rimarenning og uppfylt sín dreym um oyggjaleikagull fyri Føroyar.

 - Hatta var ein fantastisk kensla og nakað, sum eg havi ætlað mær leingi. Og eg hevði vónað, at eg hevði kunna vunnið eina gullmedalju, og eg eri so glað fyri, at tað eydnaðist, segði Maria Biskopstø.

Tíðin upp á 1:01.87 minuttir var meir enn hálvt annað sekund betri enn nummar tvey, og tað sá út til, at føroyingurin hevði fult tamarhald á.

 - Eg kom væl upp um allar hekkarnar. Teknikkurin var í lagi, og ferðin var eisini við mær í dag, segði rennarin.