Lív reistist eftir laka úrtøku móti Spania

Eingin kundi loyva sær at vera misnøgdur eftir stóra sigurin ímóti Spania fyrradagin, men um onkur hekk eitt sindur við høvdinum, var tað kanska Lív S. Poulsen.

Vongurin brendi allar fýra kjansirnar ímóti spaniólum, og tí hevði hon kanska eitthvørt at prógva, tá Føroyar fóru á gólvið ímóti Paraguai í dag. Júst tað gjørdi hon eisini við fleiri góðum málum.

Serliga fyrstu løtuna riggaði væl, og hon skoraði fleiri skjótt mál, sum tryggjaðu føroyingunum eina góða byrjan í avgerandi bólkadystinum, sum tær vunnu trygt 36-25. Hon var eisini vald til dagsins spælarar í atkvøðugreiðsluni hjá IHF.

 - Tað er gott. Serliga í mun til mítt avrik seinast, so tað eri eg ordiliga glað fyri, staðfesti høgri vongurin.

 - Eg havi hildið fokus á tað rætta, og so havi eg nakrar liðfelagar, sum spæla meg væl upp, segði Lív S. Poulsen.