Fleiri til viðtalu á Suðuroyar sjúkrahúsi

 Fleiri sjúklingar skulu hjálpast í nærumhvørvinum og fyri suðuroyingar merkir tað, at fleiri viðtalur kunnu fara fram á Suðuroyar sjúkrahúsið ístaðin fyri Landssjúkrahúsinum. Royndarætlanin byrjaði í summar og tí hava tey innan ortopedi longu royndir við at bjóða part av viðgerðini í Suðuroy.

- Okkara royndir eru, at bæði sjúklingar og starvsfólk eru øgiliga glað fyri hetta her. Tað gevur eitt sindur meira av arbeiði har suðuri, hugsi eg. Men tað er ein øgiligur vinningur hjá sjúklingum at spara um ferðingina, sigur Elinborg Mortensen, yvirlækni í ortopedikirurgi á Landssjúkrahúsinum. 

Royndarætlanin umfatar millum annað talgildar viðtalur og at serlæknar og sálarfrøðingar í størri mun ferðast suður, ístaðin fyri at sjúklingar skulu brúka ein dag til eina viðtalu í Havn, sum kanska bara tekur ein hálvan tíma.