- Vit eru ikki nóg kyniskar

 - Vit eru ikki nóg kyniskar. 

Tað var stutta staðfestingin frá Janu Mittún, sum var ørkymlað um, at tað ikki eydnaðist at vinna á Íslandi og tryggja eitt endaligt HM-pláss ímillum níggju og 12.

Soleiðis var eisini. Føroyar runnu aftaná meginpartin av dystinum, men hvørja ferð tær nærkaðust og munurin kom niður á tvey mál, spøktu mistøkini og ikki minst mistu møguleikarnir, og so vann Ísland 33-30.

 - Verjan er ikki ordiliga har, og vit gera ov nógvar feilir. Hvørja ferð vit eru við at koma aftur, mangla tær síðstu detaljurnar, so tað er tíbetur nógv, vit kunnu bøta um, segði Jana Mittún.

Hon helt ikki, at vantandi orka var nøkur umbering.

 - Vit vóru rættiiga uppsettar upp á hendan dystin, og vit høvdu alt at spæla fyri, so tað er spell, at vit ikki eru meir fokuseraðar, tá tað stendir á, segði bakspælarin, sum aftur hesa ferð spældi ein góðan dyst.

Jana Mittún skeyt seks mál upp á sjey skotroyndir og átti næstseinastu hond á sjey føroyskum málum. Sanniliga ein flottur endi upp á eitt sterkt HM-endaspæl hjá føroysku undangongukvinnuni.