Býráðslimur ímóti ætlanini hjá Tórshavnar Kommunu um leiguíbúðir

Bústaðir og Tórshavnar kommuna ætla saman at stovna eitt bústaðarfelag fyri íbúðirnar við Dalavegin í Havn. Íbúðirnar, sum upprunaliga skuldu seljast sum lutaíbúðir, verða nú í staðin leiguíbúðir.

Talan er um fyrstu royndina at stovna eitt almannagagnligt bústaðarfelag í Føroyum. Tórshavnar kommuna hevur boðað frá, at hon ætlar at seta 20 milliónir krónur í felagið. Men ikki øll í býráðnum taka undir við ætlanini.

Tróndur Sigurðsson, býráðslimur, er ímóti verkætlanini og heldur, at talan er um eina ótrygga íløgu. Hann heldur heldur, at kommunan átti at bygt bíligari íbúðir, sum vanligi borgarin hevur ráð at búgva í.

Mánaðarligi leigukostnaðurin við Dalavegin í Havn verður sambært Bústøðum millum 9.500 og 13.500 krónur, alt eftir stødd á íbúðini.

Upprunaliga, tá Bústaðir valdi at fara undir verkætlanina við Dalavegin, var ætlanin at gera íbúðirnar til leiguíbúðir. Men av tí at leiguprísurin tá varð mettur at verða ov høgur, valdi Bústaðir í staðin at royna við lutaíbúðum. Tann ætlanin er nú slept. Bústaðir sigur, at man við samstarvi við kommununa, nú hevur møguleika at áseta ein bíligari leigukostnað. 

Uppskotið um at stovna almannagagnligt bústaðarfelag kemur fyri á býráðsfundi hjá Tórshavnar kommunu komandi hósdag, 11. desember.