Hondbóltsfepur á Eiði

Smáar tvær vikur eru til landskappingin í hondbólti byrjar aftur, og á Eiði er spenningurin stórur.

EB hevur lið við í bestu mansdeildini fyri fyrstu ferð í nýggjari tíð, og lagið til venjing, har eini 20 spælarar møta upp, er gott.

 - Eg kom her fyri fimm árum síðan fyri at hjálpa við at byggja kvinnuliðið upp, og síðan hava vit hugsa um, nær vit kunnu fara í gongd við mansliðnum, sigur íslendski venjarin Kristinn Guðmundsson.

Nú skal tað so vera, og 6. september skal liðið á vøllin í Havn ímóti Neistanum.

Nógvir ungir spælarar eru í hópinum, og tí ræður um, at haldam høvdið kalt og halda seg til spæliætlanina - eisini hóast tað ikki gongur eftir vild beinan vegin, sigur venjarin.

 - Tað ræður um at smyrja seg við toli. Teir vita, at tað verður trupult, so vit skulu ikki lata okkum stressa av úrslitunum, men heldur hyggja at avrikunum á vøllinum.

Spælskiparin Torkil Debes Dahl er fullgreiður yvir, at tað kanska ikki verður so pent hvørja ferð, men málið er at fáa stig í botnstríðnum og arga tey ovaru viðhvørt.