Hoyvíkssáttmálin heldur fram

Jenis av Rana, landstýrismaður í uttanríkismálum, heitti á løgtingið um at geva sær heimild til at taka uppsøgnina aftur, eftir at hann hevur samráðst við íslendingar um broytingar í sáttmálanum.

Hoyvíkssáttmálin varð uppsagdur við virkna frá 1. januar í 2020 í sambandi við fiskivinnunýskipanina hjá undanfarnu samgongu í 2017. Har var tað millum annað var ásett, at útlendskur ognarlutur - og harvið eisini íslendskur ognarlutur - skuldi burtur úr veiðiliðinum í føroysku fiskivinnuni. 

Undir atkvøðugreiðsluni í gjár býtti løgtingið seg sundur í samgongu og andstøðu. Við endaligu atkvøðugreiðsluna vóru 16 atkvøður fyri og 13 ímóti.

Andstøðuumboðini í uttanlandsnevndini høvdu sett fram broytingaruppskot um, at grein 6 í sáttmálanum skuldi broytast, soleiðis at sáttmálapartarnir frítt skuldu kunna áseta reglur ognarrætt í fiskivinnuni. Somuleiðis ynsktu andstøðumboðini, at sáttmálin ikki longur skuldu hava gildið sum lóg. Undirtøka var tó ikki fyri hesum í Løgtinginum í gjár.

Eitt uppskot, um at beina Hoyvíkssáttmálan aftur í nevnd til víðari viðgerð, fall somueiðis.

Tingfundur verður aftur mánadagin, tá fíggjarlógin fyri 2020 endaliga skal avgreiðast frá Løgtinginum.