Tekur seg aftur sum kanslaraevni

Forkvinnan á týska flokkinum, CDU, Annegret Kramp-Karrenbauer, hevur boðað frá, at hon hevur slept ætlanini at gerast samveldiskanslari eftir Angelu Merkel.

Hon verður kortini verandi forkvinna í flokkinum, til eitt annað umboð er funnið, sum kann taka við eftir Angelu Merkel. Hon verður eisini verandi verjumálaráðharri, til val verður til ríkisdagin í 2021.

Drúgvar royndir

Kamp-Karrenbauer hevur drúgvar royndir í CDU, og longu 19 ára gomul varð hon vald í kommunustýrið í Pu:ttligen.

Hon varð í desember í 2018 vald til formann í CDU, í harðari kapping við ríkmannin, Friedrich Merz.

Nú hon hevur gjørt av ikki at gerast samveldiskanslari, sigur hon, at formaðurin í flokkinum eisini eigur at vera samveldiskanslari.

Angela Merkel hevur verið samveldiskanslari í Týsklandi í skjótt 15 ár, og tí eru tað nógv av teimum ungu, sum ikki kenna tíðina undan henni.

Gongur aftur á hondina

Tað hevur gingið støðugt aftur á hondina í politikkinum, og seinastu tíðina eru stjórnarflokkarnir, CDU og CSU, minkaðir úr 41 niður í 33 prosent í undirtøku.

Samstundis gongur støðugt framá hjá høgraflokkinum, Alternative fúr Deutschland, sum fær 13 prosent av undirtøkuni.

Í farnu viku fór flokkurin hjá Angelu Merkel í samstarv við AfD í Thu:ringen, og tað segði Angela Merkel vera ófyrigeviligt.

72 prosent eru ímóti

Avgerðin hjá Annegret Kramp-Karrenbauer um at leggja frá sær, botnar helst í, at ein meiningakanning í gjár vísti, at 72 prosent av týsku veljarunum siga seg vera ímóti henni sum kanslara.

Tí er CDU noyddur at finna ein nýggjan formann fyri valið í 2021, og sum støðan er nú, má flokkurin byrja av nýggjum, eftir at hava verið leiðandi, síðani Angela Merkel kom framat í 2005.

Nú skal flokkurin hava nýggjan fomann, og fleiri verða longu nevndir sum eftirmenn hjá Angelu Merkel, skriva Ritzau og Politiken.