Krevja Berlusconi dømdan fyri mutur

Italska tíðindastovan, ANSA, skrivar, at Berlusconi er ákærdur fyri m.a. geva einum vitni pening fyri at fáa viðkomandi at geva falska frágreiðing. 

Formaðurin í Forza Italia skal hava rindað klaverleikaranum, Danilo Mariani, pening fyri at nokta fyri at sex-veitslur hava verið heima hjá Berlusconi. Ákæruvaldið krevur, at Danilo Mariani verður dømdur 4 ár og seks mánaðar fongsulsrevsing.

Málið er eitt av fleiri, sum stavar frá ákærunum móti Berlusconi, um at hann skal hava havt kynsligt samband við ómynduga prostitueraða gentu, sum er kend undir navninum "Ruby hjartatjóvurin". Berlusconi skal eisini hava rindað kvinnum, sum vóru við í sonevndum bunga-bunga-veitslum, - eisini "Ruby hjartatjóvi" pening afturfyri at tær lúgva um tað, sum hendi í hesum veitslunum.

Berlusconi varð fríkendur fyri at hava rindað "Ruby Hjartatjóvi" fyri kynsligt samband meðan hon var ómyndug, tí dómarin metti, at Berlusconi kundi ikki vita, at hon bara var 17 ára gomul, skrivar AFP.