ALS játtað 1349 umsóknir um lønarískoyti

Fyri løtu síðani hevði Arbeiðsloysisskipanin játtað 1349 umsóknir um lønarískoyti eftir serlógini, sum er sett í verk í sambandi við korona.

770 kvinnur hava fingið umsóknina játtaða og 579 menn, skrivar ALS á heimsíðuni.

Flestu umsóknirnar, sum higartil eru játtaðar, eru úr Suðurstreymi, tilsamans 705.

197 eru úr Eysturoynni, 126 úr Norðoyggjum, 110 úr Norðstreymoynni, 109 úr Suðuroynni, 92 úr Vágum og 10 úr Sandoynni.

ALS hevur ikki viðgjørt allar umsóknirnar enn, so talið veksur nógv.

Í februar fingu tilsamans 301 fólk arbeiðsloysisstuðul úr ALS, 157 kvinnur og 144 menn.