Tríggjar systrar droyma um at lata upp matstað

Tórshavn,  Keypmannahavn og London.

Jóhanna, Fía og Anna Kristina Norðberg Niclasen búgva í hvør sínum landi.

Men ein felags instragram-profilur knýtir systrarnar saman.

Tær hava stovnað TripleYummie, har tær leggja myndir út av mati, tær hava gjørt.

Kjøtbollar í tomatsós

Jóhanna Norðberg Niclasen hevur gjørt matin í dag. Hon tekur myndir av avrikinum:

Matarskráin er kjøtbollar í tomatsós við heimagjørdum pasta og salati.

Jóhanna Norðberg Niclasen smæðist ikki at siga, at kjøtbollar er ein av hennara specialitetum.

Hakkikjøt. Onkuntíð svínakjøt  - blandað við øllum møguligum kryddi. Men týdningarmesta ingrediensið er rasp, sambært Jóhonnu.

Jóhanna ræðist annars ikki at brúka tomat-í-dós. Tomatirnar, sum fáast í Føroyum hava ikki rætta konsistensin, heldur hon.

Og so eru eingir klumpar í hvørki sósini ella í kjøtbollunum. Jóhanna Norðberg klárar ikki sjónina av klumpum. So hon hon rívir leykin, og hon blendar sósina.

Fía heldur frí

Uppskriftina til salatið hevur Jóhanna fingið sendandi frá systrini í Keypmannahavn, Onnu Kristinu. 

 - Vit rópa hana salatdrotningin, sigur Fía, sum er triðja systirin.

Hon býr vanliga í London; men er komin heim at hugsavna seg um bacheloruppgávuna. 

Tí leggur Fía einki út á TribleYummie fyri tíðina.

Men hon lovar at koma sterkt aftur í juni, tá uppgávan er latin inn.

Fía sigst annars vera tann besta av teimum trimum at gera vegetarmat.

Heimagjørdur ostur 

Jóhanna hevur eisini gjørt ostin sjálv. Heimagjørdur ricotta ostur av góðari feitari mjólk frá bóndanum í Havnardali.

Tað skal nógv mjólk til at gera ost, sigur hon.

Jóhanna Norðberg sigst eisini duga væl at gera breyð. Hon elskar breyð.

Lata upp matstað í summar

Tær tríggjar eru uppvaksnar við matgerð. Og tær hava altíð havt ein dreym um at lata upp eitt matstað.

Í summar skal tað vera. Ein pop-up matstova, ið selur take-away. Kanska heimanífrá barndómsheiminum í Varðagøtu. Ella kanska onkra aðrastaðni.

Og Instragram-profilurin er fyrsta stigið á leiðini.

Her hava tær eina motivatión at eksperimentera og finna røttu uppskriftirnar, tá matarskráin vónandi skal gerast í summar.