Grønland letur uppaftur 15. juni

Hálvan juni fer Grønland at lata uppaftur í stigum eftir koronukreppuna.

Tað gjørdi Kim Kielsen, landsstýrisformaður, greitt á tíðindafundi í dag.

Men flúgvingin millum Grønland og Danmark byrjar longu 31. mai eftir eini avtalu, sum landsstýrið hevur gjørt við Air Greenland. Eftir avtaluni verður flúgving tríggjar dagar um vikuna.

- Tey, sum halda seg vera sjúk, sleppa ikki til Grønlands, gjørdi Kim Kielsen greitt.

600 fólk

Fyrsta stigið er at loyva 600 fólkum at koma til landið um vikuna. Øll skulu vera kannað av lækna, og kanningin má ikki vera eldri enn fimm samdøgur.

Tá fólk koma til Grønlands, skulu tey í sóttarhald í fimm samdøgur, tá tey aftur verða kannað.

Fólk. sum fara úr Grønlandi, mugu sjálvi taka ábyrgdina fyri tí,sum tey gera. Og verða fólk sjúk, mugu tey ikki koma heimaftur, segði Kim Kielsen.

Tá farið verður til næsta stig, er ætlanin, at 1200 fólk skulu kunna koma til Grønlands um vikuna, men nær tað stigið verður sett í verk, er ikki avgjørt enn, segði grønlendsku landsstýrisformaðurin.