Skriva álit um at skatta vinning av veiðirættindum

Málið um at skatta vinning, tá veiðirættindi verða seld, er enn í Fíggjarnevndini, og álit verður skrivað, sigur formaðurin í nevndini.

Tað sama er at siga um hitt málið, sum er um at krevja kapitalvinningsskatt frá fólki, sum býr uttanlands, og tí hava avmarkaða skattskyldu her.

Av tí at landsstýrið sendi ikki tey bæði uppskotini til hoyringar, áðrenn tey fóru í løgtingið, hevur Fíggjarnevndin havt nógvar innkallingar.

Magnus Rasmussen, formaður í Fíggjarnevndini, væntar at fáa seinastu viðmerkingarnar í dag ella í morgin.

Nevndin hevur biðið tey, sum hava verið á fundi við nevndina um málini, um at senda nevndini skrivliga tey sjónarmið, sum tey høvdu á fundunum við Fíggjarnevndina.