Nógv roks at senda listaverk til Danmarkar

Tað skal verða lættari hjá listafólki at senda síni verk til Danmarkar í sambandi við framsýningar har.

Tað sigur danski skattamálaráðharrin, Morten Bødskov.

Men hvussu tað skal gerast ítøkiliga, hevur hann einki boð uppá nú.

Ráðharrin hevur svarað einum spurningi frá Sjúrði Skaale, fólkatingsmanni.

Hann spurdi um trygdina, sum listafólk skulu lata tollvaldinum, tá tey senda listaverk millum londini í ríkisfelagsskapinum.

Ikki tí, at trygdin er so stór, men tað er bæði torført og tekur langa tíð at fáa trygdina avgreidda.

Bureaukrati

Sjúrður Skaale spurdi Morten Bødskov um hetta langdrigna bureaukratiið.  

Morten Bødskov sigur, at stjórnin raðfestir ríkisfelagsskapin og vil fegin kanna tað, sum spurt verður um.

Hann sigur tað ikki vera í lagi, at danska skattavaldið hevur langdrignar og bureaukratiskar mannagongdir sum tær, Sjúrður Skaale spyr um.

Men ráðharrin vil hava fólkatingsmannin at senda Skattamálaráðnum fleiri upplýsingar um málið. 

Morten Bødskov sigur, at stjórnin raðfestir skjótar og lagaligar mannagongdir hjá skattavaldinum.