Sjóvinnustýrið verður á Giljanesi

Nú hevur landsstýrið fingið eitt stykki til bygningin hjá Sjóvinnustýrinum.

Landið hevur gjørt gerðarbýti við Vága kommunu.

Landið átti eitt stykki í grótbrotinum í Sandavági. Fyri tað hevur landið fingið eitt stykki á Giljanesi.

Jørgen Niclasen, landsstýrismaður, skrivaði undir skeytið í gjár. 

Hann sigur, at byggingin verður boðin út í heyst.

Í mesta lagi 13,7 mió. kr.

Løgtingið samtykti í 2017, at Sjóvinnustýrið skuldi byggja í Vágum fyri í mesta lagi 13,7 mió. kr.

Verklagslógin um byggingina varð samtykt á vári 2018. 

Í fíggjarlógini fyri 2020 eru 5,3 mió. kr. til byggingina.

Sjóvinnustýrið hevur síðani á sumri 2016 húsast í fyribilshølum í Havn, eftir at stovnurin noyddist at flyta úr leigaðum hølum í Miðvági, sum ikki vóru mett at vera egnað.