Politikarar skulu ikki raðfesta trygd

Tað er ikki rætt, at politikararnir ráðfesta trygdina hjá Landsverki, tað skal Landsverk gera.

Beinta Løwe, løgtingskvinna, hevur skotið upp at játta tríggar milliónir krónur til trygdarútgerð í bergholunum norður um Fjall og í øðrum bergholum.

Men meirilutin í Fíggjarnevndini hjá løgtinginum, samgonguflokkarnir og Sjálvstýri, mælir løgtinginum frá at samtykkja uppskotið.

Er trygdin á einum vegi, einari brúgv ella í einum bergholi ikki í lagi, verður farleiðin stongd. Tí eru allar farleiðir, sum hava opið, mettar at vera tryggar, eisini tunlarnir norður um Fjall, sigur meirilutin í Fíggjarnevndini.

13 mió. kr. til dagføringar

Meirilutin sigur annars, at í uppskotinum um fíggjarlóg fyri 2021 eru 13 mió.kr. til at dagføra brýr og berghol. Í 2019 vóru 5,5 milliónir til endamálið, og átta milliónir eru í ár.

Nevndarlimirnir hjá andstøðuni í Fíggjarnevndini taka undir við uppskotinum.

Tey minna á, at í summar kom eldur í ein bil í Árnafjarðartunlinum. 

Tá kom fram, at trygdarútgerð var ikki uttan fyri bergholið. Og Landsverk boðaði frá, at peningur var ikki tøkur til hesa útgerð.