Vilja ikki gjalda fyri fleiri sjúkradagar

Arbeiðsgevarar eru ikki blíðir, nú landsstýrið ætlar, at teir skulu gjalda dagpening fyri triðja og fjórða dag eisini.

Landsstýrið ætlar at broyta lógina um dagpengar vegna sjúku, so arbeiðsgevarar skulu gjalda fyri fýra dagar í staðin fyri tveir dagar sum nú.

Við hesum ætlar landsstýrið at spara fimm millíónir krónur næsta ár.­­­­­­­­­­­­­­­­­­­­­­­­­­­­­­­­­

Eingin hoyring

Føroya arbeiðsgevarafelag átalar eisini staðiliga, at lógarbroytingar verða lagdar fyri løgtingið uttan at hava verið til hoyringar hjá viðkomandi pørtum.

Broytingin í dagpeningaskipanini er at flyta útreiðslur frá landskassanum yvir á arbeiðsgevarar, og hetta verður gjørt uttan hoyring ella umrøðu av málinum yvirhøvur. Føroya arbeiðsgevarafelag mótmælir slíkari mannagongd.

Arbeiðsgevarafelagið sigur, at lógarbroytingin kostar arbeiðsgevarum eitt fjórðings prosent av lønarútreiðslunum.