Fimti hvør føroyingur vigar ov nógv

Nógvir føroyingar viga ov nógv, vísir kanningin hjá Fólkaheilsuráðnum, sum varð gjørd í fjør. Og tey viga meira nú enn í 2015.

Í 2015 høvdu 66 prosent av monnunum og 51 prosent av kvinnunum eitt BMI, sum var hægri enn 25. Tey, sum hava meira enn 25 í BMI, viga ov nógv.

Í fjør høvdu 69 prosent av spurdu monnunum meira enn 25 í BMI, hjá kvinnunum var talið 56 prosent.

Serliga kvinnurnar viga meira nú enn í 2015. Fleiri kvinnur hava nú ovurvekt, eitt BMI, sum er yvir 30.   

Flest í Sandoynni og Suðuroynni

Tey flestu, sum hava yvirvekt ella ógvusliga yvirvekt, eru í Sandoynni og Suðuroynni. Tey fæstu eru í Havn.

Samanum kann sigast, at fimti hvør føroyingur er feitur, sigur Fólkaheilsuráðið. Tey feitu hava eitt BMI, sum er yvir 30.

Tað eru serliga arbeiðsleys og fyritíðarpensjónistar, sum eru feit.

Samanbera vit føroysku tølini um yvirvekt og ógvusliga yvirvekt við onnur lond, eru tølini størri í Føroyum enn í Danmark, Noregi og Svøríki.

Føroyar eru beint aftan fyri Ísland og ikki langt frá USA.