Eingin dómsmaður tilnevndur

Eitt mál um endurgjald fyri at vera í varðhaldi hjá politinum skuldi viðgerast í Føroya rætti í gjár.

Men tað bleiv útsett, tí nýggja rættargangslógin, sum kom í gildi á nýggjárinum, sigur, at tveir dómsmenn skulu við vera í slíkari viðgerð.

Teir vóru ikki tilnevndir til rættarfundin í gjár, so fundurin varð útsettur. Kravið um endurgjald er 10.000 krónur.

Ein dag í varðhaldi

Maðurin var ein dag í varðhaldi hjá politinum, skuldsettur fyri drápsroynd fyrst í mai 2017.

Men í grundlógaravhoyringini varð maðurin latin leysur, tí rætturin helt ikki, at grundaður illgruni var um skuldsetingina.

Vanliga endurgjaldið er 5.000 krónur fyri fyrsta dagin í varðhaldi, men tá skuldsetingin er so grov sum drápsroynd verður endurgjaldið tvífaldað.