Kærustovnurin skal hava sjálvstøðugan myndugleika

Ein kærustovnur skal stovnast og virka sum sjálvstøðugur myndugleiki.

Átta kærunevndir og tríggjar avgerðarnevndir skulu leggjast niður. Kærustovnurin er skrivstova hjá teimum.

Landsstýrið hevur gjørt eitt lógaruppskot um Føroya kærustovn.

Tað er farið til hoyringar.

Heimildirnar hjá teimum 11 nevndunum skulu flytast til Kærustovnin. Tær fyrstu nevndirnar verða, sambært uppskotinum, tiknar av 1.januar næsta ár, tann seinasta 1.januar í 2024.

Skotið verður eisini upp at finna aðra skipan fyri Fjølmiðlanevndina.

Arbeiða skjótari

Landsstýrið sigur, at kærurnar verða skjótari avgreiddar enn nú, tá Kærustovnurin gerst sjálvstøðugur myndugleiki.

Ein arbeiðsbólkur gjørdi í fjør eitt drúgvt álit um Kærustovnin.

Har var niðurstøðan, at fyrimunirnir við at halda fram við Kærustovninum eftir verandi leisti eru færri enn vansarnir.

Eitt høvuðstilmæli hjá bólkinum var júst at flyta allar 11 nevndirnar, sum Kærustovnurin í dag er skrivstova hjá, inn í sjálvan Kærustovnin. 

Føroya kærustovnur byrjaði í 1998.