Føroya Tele letur landinum 32 mió. í vinningsbýti

Landið fær 32 milliónir krónur í vinningsbýti frá Føroya Tele.

Samtakið hevur havt ársaðalfund í dag, har roknskapurin fyri 2020 varð lagdur fram, sigur samtakið í tíðindaskrivi.

Úrslitið í fjør gjørdist góðar 31 milliónir krónur eftir skatt, og eigarin, Føroya Landsstýri, fær 32 milliónir krónur í vinningsbýti.

Samanborið við 2019, var úrslitið eftir skatt í fjør umleið tvær milliónir krónur minni, vísir roknskapurin.

Úrslitið var í fjør merkt av øktum rakstrarkostnaði, sum í stóran mun stavar frá umvælingum av millumoyggjasjókaðalum, ið fingu skaða av illveðri fyrst í árinum.

Íløgurnar hjá Føroya Tele vóru í fjør 131 milliónir krónur.

Nevndin óbroytt

Nevndin hjá Føroya Tele heldur fram. Landsstýrið velur tríggjar nevndarlimir, og starvsfólkini á Føroya Tele velja trý umboð.

Bjarni Arnason, Johnni M. Poulsen, Lena L. Mohr og Annbritt Tummasdóttir Nielsen vórðu afturvald á aðalfundinum í dag.

Starvsfólkavaldu nevndarlimirnir eru Ólavur Simonsen, Levi T. Nybo og Finnbjørn Simonsen. Nevndin hevur skipað seg við Bjarna Arnasyni sum formanni og Johnni M. Poulsen sum næstformanni.

Nevndarformaðurin vil í dag ikki gera viðmerkingar til vinningsbýtið.