Earth Hour: Nógv fleiri sløktu ljósið í fjør

Tað merktist týðiliga hjá SEV, at fleiri kommunur í landinum sløktu gøtuljósini og at heitt varð á fólk um at sløkkja ljósið ein tíma í gjárkvøldið.

Elframleiðslan hjá SEV minkaði 3,5 Megawatt í gjárkvøldið tá fleiri kommunur heittu á fólk um at sløkkja ljósið frá 20:30 - 21:30.

Fleiri sløktu í fjør

Kortini vóru tað nógv fleiri sum sløktu ljósið til Tíma jarðarinnar í fjør, tá elframleiðslan hjá SEV minkaði við 4,78 Megawatttímum. Fyrraárið minkaði elframleiðslan 1,65 Megawatttímar.

Hjá teimum, sum hóast alt høvdu ljósið og eltól tendrað hendan tíman frá 20:30 - 21:30 í gjárkvøldið, var elorkan, sum SEV framleiddi, 82 prosent burðardygg.

Tími jarðarinnar, ella Earth Hour, sum hann nevnist úti í heimi, varð fyrsti ferð hildin í Avstralia í 2007 fyri at varpa ljós á veðurlagsbroytingarnar í øllum heiminum.