Lóg sum ger fjarskifti til trygdarpolitikk á veg

Lógin, sum tengir saman fjarskifti og trygd, hevur fingið fyrstu viðgerð í fólkatinginum og er nú í verjunevndini hjá tinginum.

Trine Bramsen, verjumálaráðharri, eigur lógaruppskotið.

Uppskotið hevur elvt til kjak í Føroyum, tí fjarskifti eru yvirtikið málsøki, men tað er trygdin ikki.

Serliga verður stúrt fyri, at Kina sleppur framat fjarskiftinum í danska ríkinum, tí ein hin størsti veitarin, Huawei, er kinesiskur.

Tá fyrsta viðgerð var í fólkatinginum, segði Bruno Elrup í Eindarlistanum, at gott hevði verið, um lógin eisini verður galdandi fyri Føroyar og Grønland, so veitarar ikki kunnu brúka tey bæði londini sum bakdyr til danska marknaðin.

Liselott Blixt í Danska fólkaflokkinum segði, at lógin skal halda ávísum veitarum frá Danmark, Føroyum og Grønlandi.

Verja trygdina

Lógin eitur "lov om leverandørsikkerhed i den kritiske teleinfrastruktur".

Sambært uppskotinum kann Center for Cybersikkerhed seta telefyritøkum forboð fyri at brúka ávisar veitarar.

Tað kann eisini seta forboð fyri at brúka avtalur við veitarar, sum longu eru gjørdar.

Endamálið er at verja trygdina hjá statinum, sigur Verjumálaráðið.