Veiðigjøldini til viðgerðar í dag

Tingið fer í dag at viðgera lógaruppskotið hjá landsstýrinum um veiðigjøld. 

Lógaruppskotið byggir á eitt tilmæli frá arbeiðsbólki, sum embætisfólk í Fíggjarmálaráðnum, TAKS og Vørn vóru í.

Reiðarafelagið og Nótaskip vóru eisini við. 

Veiðigjøldini eru mett at geva landskassanum okkurt um 300 mió. kr.   

Uppsjóvarfiskur og Barentshavið gjalda

Veiðigjaldið verður ásett út frá miðal-avreiðingar-prísinum fyri óviðgjørdan, feskan makrel, norðhavssild og svartkjaft. 

Miðalprísurin verður ásettur fyri tíðarskeiðið 1.juli til 30.juni, og verður galdandi fyri árið eftir. 

Fyri botnfisk í Barentshavinum verður veiðigjaldið roknað út frá miðal avreiðingarprísinum á Fiskamarknaði Føroya árið fyri. 

Í báðum førum gevur stórur avreiðingarprísur lutfalsliga størri veiðigjald, lítil avreiðingarprísur gevur lutfalsliga minni veiðigjald.

Tingfundurin í dag byrjar klokkan 13.30.