Kanna starvsfólkatørv á dagstovna- og eldraøkinum

Illa gongst at fáa fólk til at arbeiða á dagstovnaøkinum og eldraøkinum. Kommunala arbeiðsgevarafelagið hevur seinastu tíðina lagt dent á at kanna starvsfólkatørvin á dagstovnaøkinum og eldraøkinum.

Endamálið er at gera eina heildarætlan um, hvussu fólk fæst til at arbeiða á dagstovnum, ellisheimum og aðra staðni á eldraøkinum. 

Kommunala arbeiðsgevarafelagið kannar eisini møguleikan at gera ein kommunalan hagtalsgrunn, sum kann geva kommununum støðuga atgongd til hagtøl fyri betur at kunna gera greiningar, framrokningar og uppgerðir.

Ársfundur í gjár

Í síðstu viku høvdu Kommunala arbeiðsgevarafelagið og Pedagogfelagið evnisdagar. Kommunufelagið og Lønardeildin í Fíggjarmálaráðnum vóru boðin við. 

Evnisdagarnir eru liður í komandi sáttmálasamráðingunum millum Kommunala arbeiðsgevarafelagið og Fíggjarmálaráðið og Pedagogfelagið.

Eisini her var starvsfólkatrotið eitt høvuðsevni. Kommunala arbeiðsgevarafelagið hevði ársfund í gjár.