Jenis hittir amerikanska uttanríkisráðharran

Mánadagin fer Jenis av Rana, landsstýrismaður, á fund við amerikanska starvsbróður sín Antony Blinken í Keypmannahavn.

Danski uttanríkisráðharrin, Jeppe Kofod, og grønlendski uttanríkisráðharrin, Pelle Broberg, verða eisini á fundinum, sum verður í Keypmannahavn.

Umframt mál av áhuga fyri ávikavist Danmark og Grønland, skulu millum annað samstarvið millum Føroyar og USA og støðan í Norðurhøvum og Arktis umrøðast.

Jenis av Rana hitti undanfarna amerikanska uttanríkisráðharran, Michael Pompeo, í Keypmannahavn í juli í fjør.

Í november skrivaðu Føroyar og USA undir partalagsyvirlýsing um økt sínámillum samstarv.