Vil hava Tvøroyrar kommunu at viðgera innlitsmál av nýggjum

Løgtingsins umboðsmaður hevur biðið Tvøroyrar kommunu viðgera eitt innlitsmál av nýggjum.

Ein klaga kom um málsviðgerðina hjá Tvøroyrar kommunu og um, hvussu kommunan viðgjørdi eina umbøn um innlit.

Talan er um tilboð um at reka kantinuna í ítróttarhøllini í Trongisvági.

Tann, sum kærdi, fekk ikki raksturin. Tann, sum hevði hann, fekk hann aftur. 

Kommunan valdi, sum hon segði, tryggu og kendu loysnina.

Skjalfesti ikki fundirnar

Hetta tekur umboðsmaðurin ikki støðu til. Men fýlst verður á, at kommunan ikki skjalfesti betur fundirnar, sum hon hevði við teir báðar tilboðsgevararnar.

Grundgevingin, sum klagarin fekk um, hví hin tilboðsgevarin varð valdur framum klagaran, var ikki nøktandi. 

Umboðsmaðurin heldur, at kommunan vísti ikki góðan fyrisitingarsið í sambandi við útbjóðingina.

Viðvíkjandi innlitsumbønini vísti umboðsmaðurin á, at 10 skjøl eru skrásett í málinum. Kommunan gav bara innlit í átta skjøl, men nevndi einki um hini tvey skjølini.

Fyrsta avgerðin

Umboðsmaðurin viðmerkir eisini, at eingin orsøk var til at biðja klagaran koma á kommunuskrivstovuna at lesa skjølini, innlit varð latið í.

Av tí at eingi avrit vórðu latin klagaranum, hevði Tvøroyrar kommuna heldur ikki neyðugu heimildina at krevja gjald fyri avrit í hesum føri.

Hetta er fyrsta avgerðin hjá Løgtingsins umboðsmanni, síðani Hanna Vang tók við starvinum 1.apríl.

Hanna Vang, Løgtngsins umboðsmaður,

Hanna Vang, sum tók við sum Løgtingsins umboðsmaður 1. apríl, hevur tikið fyrstu avgerðina.