Djordjevic flytur úr ÍF til TB

Á Tvøroyri liva tey enn í vónini um, at tað skal eydnast TB at varðveita plássið í bestu fótbóltsdeildini. 

Í tí sambandi, hevur TB skrivað sáttmála við áleyparan Filip Djordjevic, sum sostatt flytur úr ÍF til TB. 

Á Facebook skrivar TB-leiðslan, at uppgávan at varðveita sætið í bestu deildini er møtimikil, men ikki ómøgulig. 

Fleiri leikarar eru eisini givnir í TB, og leiðslan í felagnum takkar teimum fyri tíðina, men fegnast um tilgongdina av nýggjum leikarum. 

"Vit hava fingið nýggjar leikarar ístaðin fyri teir, ið eru givnir, og ynskja vit teimum vælkomnum í felagið. Tann seinasta undirskriftin kom í gjár, tá ið sáttmáli varð gjørdur við roynda og evnaríka Filip Djordjevic, ið sostatt flytir frá ÍF til TB."

Filip Djordjevic er 27 ára gamal. Hann er serbiskur ríkisborgari, høgra beintur, og kann spæla bæði á miðjuni og í álopinum.

Djordjevic hevur umboðað KÍ, Víking og ÍF, og á Faroescoccer.com  er hann skrásettur fyri 244 dystir í bestu deildini, og hann hevur skotið 39 mál.