Allar landingar skulu loggast

Fiskiveiðieftirlitið hevur sett nøkur nýggj krøv um innvigingarskipanir. Tey koma í gildi 1.august.

Allur fiskur, sum kemur í land í Føroyum, skal í eina innvigingarskipan, sum Fiskiveiðieftirlitið hevur góðkent.

Fyri at kunna hava eitt nøktandi eftirlit við fiskinum, hevur Fiskiveiðieftirlitið mett tað vera neyðugt at áseta nøkur nýggj krøv.

Allar innvigingar skulu loggast

Fiskiveiðieftirlitið krevur, at innvigingarskipanin skal hava ein logg, so til ber at goyma upplýsingar um landingina í minsta lagi í eitt ár. 

Fiskiveiðieftirlitið skal ómakaleyst kunna fáa atgongd til hesar upplýsingar.

Vektin í innvigingarskipanini skal í minsta lagi kunna viga upp til 150 kg.

Og vektin skal altíð nýtast sama stað. 

Góðkenningar halda fram

Innvigingarskipanir, sum í dag eru góðkendar, kunnu halda fram uttan at lúka nýggju krøvini. 

Men tá góðkenningin skal endurnýggjast er neyðugt, at innvigingarskipanin lýkur nýggju treytirnar.