Vit fáa fólkaheilsustýri á nýggjárinum

Eitt fólkaheilsustýri kemur á nýggjárinum.

Tað stendur í ískoytispartinum til røðuna, sum løgmaður helt í løgtinginum í gjár.

Har stendur, at seinnu árini er vorðið støðugt meira eyðsýnt, at yvirskipaðu heilsufakligu uppgávurnar í Føroyum mugu  savnast á einum staði, í einum fólkaheilsustýri. 

Talan verður ikki um at gera nýggjan stovn, men at leggja uppgávur hjá ymsum ráðum, deildum og stovnum saman í eitt fólkaheilsustýri. 

Korona gjørt tørvin sjónligari

Við at skipa smáu eindirnar á heilsuøkinum í eitt stýri ber til at nýta verandi orku á økinum nógv skynsamari enn nú, sigur landsstýrið.

Tørvurin á einum fólkaheilsustýri gjørdist sera sjónligur, tá korona kom.

Av tí at einki slíkt stýri var, varð eitt heilsufakligt ráðgevaratoymi skipað í Heilsumálaráðnum.

Royndir haðani eru brúktar, nú fólkaheilsustýrið skal gerast.