Útlendingar skulu søkja um loyvi at keypa hús í Føroyum

Nú skulu útlendingar søkja um loyvi at keypa hús í Føroyum.

Tað segði løgmaður í ólavsøkurøðuni. 

Skipanin fer at leggja upp til, at øll, sum búgva fast í Føroyum - sama hvat tjóðskapurin er - kunnu keypa fastogn, uttan at søkja loyvi frammanundan.

Men loyvisskipanin hevur við sær, at persónar ella feløg, sum ikki hava fastan bústað í Føroyum, og sum heldur ikki hava búð í landinum í samanlagt fimm ár, skulu søkja landsstýrið um loyvi at keypa, ella á annan hátt ogna sær fastogn í Føroyum.

Vilja finna javnvág

Landsstýrið sigur seg vilja finna eina javnvág ímillum, at útlendingar hava rímiligan møguleika at keypa fastogn í landinum, og tað, at útlendskur ognarrættur til fastogn í Føroyum, ella í ávísum økjum í landinum, ikki verður ov stórur. 

Nýggja lógin skal ikki seta óneyðugar forðingar fyri útlendskum vinnuvirksemi í Føroyum.

Uppskot um løgtingslóg at keypa fastogn í Føroyum er gjørt, og hevur verið til ummælis hjá viðkomandi pørtum. Ætlanin er at leggja uppskotið fyri Løgtingið eftir ólavsøku, sigur løgmaður í fylgiskjali til ólavsøkurøðuna.