Hannes við landsliðnum fyri fyrstu ferð

Hannes Agnarsson er tikin út til fótbóltslandsliðið við monnum fyri fyrstu ferð. Hann verður í hópinum til dystirnar ímóti Eysturríki og Skotlandi fyri Daniel Johansen, sum hevur givið avboð vegna skaða. Tað skrivar fsf.fo.

Úttøkan er komin óvart á B36-spælaran.

 - Eg bleiv sera yvirraskaður av boðunum, tí eg var ikki ordiliga klárur yvir, at eg var so nær landsliðnum, sigur Hannes Agnarsson við heimasíðuna hjá Fótbóltssambandi Føroya.

Tað var annars á tíðindafundi fyri lítlari viku síðani, at Eli Hentze, hjálparvenjari, kunngjørdi hópin til komandi dystir. Samstundis var boðað frá, at seinni í vikuni fór ein spælari afturat at verða úttikin, og valið fall á Daniel Johansen úr HB.

Men í dystinum millum B36 og HB sunnnudagin mátti HB-bakkurin av vøllinum við skaða, og hevur tí givið avboð til komandi dystirnar.

– Eg eri ótrúliga spentur og glaður fyri møguleikan, og eg síggi fram til at verða partur av landsliðnum. Fyri ein fótbóltsspælara er ikki nógv, ið verður størri enn hetta, sigur Hannes við heimasíðuna hjá FSF.

Leygardagin 9. oktober spæla Føroyar og Eysturríki á Tórsvølli, og tríggjar dagar seinni, týsdagin 12. oktober koma skotar á vitjan.