Kriminalforsorgin: Betri samstarv við myndugleikar í Føroyum

Betri samstarv skal vera millum Kriminalforsorgina og myndugleikarnar í Føroyum um leyslatnar fangar.

Kriminalforsorgin skal seta seg í samband við Almannaverkið um, hvussu hetta arbeiðið skal gerast.

Føroyski-danski arbeiðsbólkurin, sum var settur fyrst í ár at greina Kriminalforsorgina í Føroyum, hevur latið frá sær greiningina.

Hon viðger fyrst og fremst, hvussu fólk, sum vera dømd inn at sita, skulu fáa betri umstøður í Føroyum.  

Fjølbroyttari tilboð

Millum annað verður mælt til, at landsstýrið og danska mentamálaráðið samráðast um størri fjølbroytni í tilboðunum um útbúgving og arbeiði í varðhaldinum í Mjørkadali.

Eisini mælir bólkurin til at kanna, um serligt hús kann gerast til leyslatin at búgva í beint eftir, at tey eru latin leys. Slík hús vera brúkt til at slúsa fólk út aftur í samfelagið, beina tey á rætta leið.

Kriminalforsorgin hevur sjey slík hús í Danmark, men einki í Føroyum. Kriminalforsorgin tosar við Bláa kross um slíkan møguleika í Føroyum.

Í løtuni er tó ikki brúk fyri slíkum húsi í Føroyum, heldur arbeiðsbólkurin. 

Í arbeiðsbólkinum vóru umboð fyri landsstýrið, danska løgmálaráðið, Kriminalforsorgina í Danmark og í Føroyum og politiið í Føroyum.

Bólkurin hevði níggju fundir, frá 5.februar til 13.september.