Fiskimálaráðið: Avgerðin um kvotuútlutan stendur við

Smápartafeløgini Faroe Marine Ingredients, North Atlantic Seafood og Ornanes og íverksetarafelagið 08.02.2021 fáa ikki kvotu frá Fiskimálaráðnum í hesum umfarinum.

Fiskimálaráðið hevur svarað, at viðgerðin verður ikki tikin uppaftur.

Feløgini bóðu um uppafturtøku.

Vinnuligar royndir og verkætlanir

Talan er um uppsjóvarfisk í sambandi við ítøkiligt skipakeyp til vinnuligar royndir og verkætlanir.

Fyrr hevur Fiskimálaráðið boðað frá, at umsóknirnar hjá smápartafeløgum Móti og JKS Impex verða heldur ikki viðgjørdar av nýggjum.

Fiskimálaráðið sigur, at avgerðirnar um kvotur kunnu ikki kærast til Fiskimálaráðið.

Mugu í rættin

Einasti máti hjá feløgunum at fáa viðhald er at royna málini í rættinum.

Smápartafeløgini Ango og Gráastein fingu kvoturnar, sum Fiskimálaráðið læt í sambandi ítøkiligt skipakeyp. 

Sambært heimasíðnuni Vesselfinder kom Junior, sum Ango hevur keypt í Danmark, á Havnina í gjárkvøldið.

Havfisk, sum Gráastein hevur keypt í Noregi, er enn í Noregi, á veg úr Tromsø til Ålesund, sambært Vesselfinder.