Skulu velja fólk fyri Brand og Anniku

Fólkaflokkurin skal seta fólk í nakrar tómar nevndarsessir í løgtinginum, nú Annika Olsen og Brandur Sandoy eru farin úr løgtinginum, og Elsebeth Mercedis Gunnleygsdóttur og Jacob Vestergaard, eru farin úr landsstýrinum í løgtingið.

Setur flokkurin fólk fyri fólk í nevndarsessirnar, skal bara ein fráboðan til frá valbólkinum hjá samgonguni og Sjálvstýri.

Er ætlanin at gera aðrar broytingar, skal løgtingið viðgera nevndarvalið. 

Annika Olsen og Brandur Sandoy vóru bæði í Uttanlandsnevndini.

Brandur Sandoy var eisini varalimur hjá Kristini Michelsen í Fíggjarnevndini.

Annika Olsen var eisini í Trivnaðarnevndini og varalimur í Útnorðurráðnum og í Mentanarnevndini. 

Næsti tingfundur verður týsdagin í næstu viku.