Ætla at royna fiskireiðskapin fyrst í februar

Christian í Grótinum fer fiskiroyndartúr í fyrsta lagi í viku seks, sum byrjar 7.februar.

Tað sigur Bogi Rasmussen, sum verður skipari á nýggja uppsjóvarskipinum, sum verður bygt í Danmark.

Á fiskiroyndartúrinum verður fiskireiðskapurin royndur.

Eftir hann skal skipið málast, og tá veldst nógv um, hvussu veðrið verður.

Seinkaður

Sambært sáttmálanum skuldi Christian í Grótinum latast 27.januar.

Men tað verður í fyrsta lagi hálvan februar ella í seinni helvt í februar, sigur Bogi Rasmussen.

Christian í Grótinum fer at fiska svartkjaft, tá hann er komin til Føroya.

Christian í Grótinum er fimta skipið við tí navninum. Tað fyrsta bleiv bygt á Skála í 1975.