Hvítarussland koyrt úr HM-undankappingini í hondbólti

Play-off dystirnir, sum føroyska hondbóltslandsliðið við monnum skuldi spæla ímóti Hvítarusslandi í mars, verða helst avlýstir. 

Evropeiska hondbóltssamgongan, EHF, hevur koyrt bæði hvítarussar og russar úr øllum evropeiskum hondbóltskappingum, orsakað av russisku innrásini í Ukraina, sum Hvítarussland stuðlar.

Fyrri dysturin millum Føroyar og Hvítarussland skuldi spælast í Havn 16. mars, og seinni dysturin í hvítarussiska høvuðsstaðnum, Minsk, 20. mars.

EHF sigur, at tey næstu dagarnar fara at gera av, hvussu verður við teimum dystunum, sum verða ávirkaðir av avgerðini.

Um dystirnir millum Føroyar og Hvítarussland ikki verða spældir, fer Føroyar mest sannlíkt víðari til 2. og síðsta play-off umfarið, har Týskland verður mótstøðuliðið. 

Undan avgerðini hjá EHF, hevði Hondbóltssamband Føroya boðað evropeisku hondbóltssamgonguni frá, at HSF var ørkymlað um støðuna í Ukraina.