Kundar í Betri trygging fáa 40 mió. kr. í vinningsbýti

Betri hevur fingið loyvi frá Kappingarráðnum at lata teimum, sum hava trygging í Betri trygging, vinningsbýti ella afturbering.

Tað er ikki brot á forboðið móti at misnýta ráðandi støðu sambært kappingarlógini, sigur Kappingarráðið.

Nevndin í Ognarfelagi tryggingartakaranna hevur avgjørt, at vinningsbýti skal rindast limunum í felagnum. 

Limirnir eru tryggingartakararnir hjá Betri trygging.

Fíggjarliga væl fyri

Grundgevingarnar fyri at rinda vinningsbýti eru, at felagið nú er nóg væl fyri fíggjarliga, og at leisturin hjá felagnum er slík afturbering.

Leiðslan í partafelagnum Betri hevur tí biðið Kappingarráðið vátta, at hetta ikki er í stríð við kappingarlógina.

Og tað hevur kappingarráðið nú gjørt.

Vinningsbýtið í ár er 40 mió. kr.